Sri Lanka ayaa ku dhawaaqday xaalad degdeg ah Khamiista, saacado ka dib markii madaxweyne Gotabaya Rajapaksa uu ka tagay dalka, xafiiska ra'iisul wasaaraha ayaa yiri.

Mudaaharaadyo waaweyn ayaa ka socday Sri Lanka maalintii Axadda.

Afhayeen u hadlay Ra’iisul Wasaaraha Sri Lanka Ranil Wickremesinghe ayaa lagu soo waramayaa in uu sheegay in xafiiskiisa uu ku dhawaaqay xaalad deg deg ah oo lagu soo rogay xaaladda dalkaasi, sababtuna ay tahay bixitaanka madaxweynaha dalkaasi.

Booliska Sri Lanka ayaa sheegay in ay bandow aan xadidneyn ku soo rogayaan gobolka galbeedka oo ay ku jirto caasimadda Colombo, si ay u xakameeyaan dibadbaxyada isa soo taraya ka dib markii uu madaxweynaha ka tagay.

Kumanaan dibadbaxayaal ah ayaa isku gadaamay xafiiska ra'iisul wasaaraha, waxaana booliiska ay ku qasbanaadeen inay sunta dadka ka ilmeysiisa ku furaan dadka, sida ay wararku sheegayaan.

Bilihii la soo dhaafay, Sri Lanka waxaa soo food saartay gabaabsi dhanka lacagaha qalaad, sare u kaca qiimaha iyo korontada iyo shidaal yarida.Dibad-baxayaasha ayaa dhigay dibadbaxyo xiriir ah oo ay ku dalbanayaan in xal degdeg ah laga gaaro dhibaatada dhaqaale ee dalka ka jirta.

Dibadbaxayaal aad u fara badan ayaa dab qabadsiiyay guriga uu degan yahay ra’iisul wasaaraha oo ku yaala magaalada Colombo ee xarunta dalka Sri Lanka.Mudaaharaadayaasha ayaa sidoo kale gudaha u galay xarunta madaxtooyada, iyaga oo sawiro ka qaadaya, ku nastay, jimicsi sameeyay, dabaalanayay oo xitaa la ekaa “kulan” mas’uuliyiinta ka socday qolka shirarka ee madaxtooyada.

Isla maalintaas, ra'iisul wasaaraha Sri Lanka Ranil Wickremesinghe wuxuu sheegay inuu iscasilayo.Isla maalintaas, Madaxweyne Mahinda Rajapaksa waxa kale oo uu sheegay in uu ku wargeliyay Afhayeenka Abbewardena in uu iska casili doono xilka madaxweynaha 13-ka.

11-kii, Rajapaksa wuxuu si rasmi ah ugu dhawaaqay inuu iska casilayo xilka.

Isla maalintaas, Abbewardena wuxuu sheegay in baarlamaanka Sri Lanka uu aqbali doono magacaabista musharraxiinta madaxweynaha 19-ka bisha, ayna dooran doonaan madaxweyne cusub 20-ka bisha.

Laakiin saacadihii hore ee 13-aad Mr Rajapaksa si lama filaan ah ayuu dalka uga baxay.Isaga iyo xaaskiisa ayaa la geeyay meel aan la shaacin oo ay booliisku galbinayeen ka dib markii ay gaareen Maldives, wakaaladda wararka ee AFP ayaa ka soo xigatay sarkaal ka tirsan garoonka diyaaradaha ee caasimadda Male.